NuNu & Me — 我們的按摩之路

越早開始替BB開始按摩～ 效果越好～ 越快能體驗到按摩帶來的好處～ 

 

身為嬰兒按摩導師的我當然把握機會幫NuNu massage一下啦～ 
 
初生嬰兒大多數時間都是吃和睡～ 特別到了猛長期～ 他們的食量跟進食次數可以變得unbelievable的多~

我就正在經歷每個小時都要餵奶的情況......因為我是全埋身，簡直挑戰人體極限！！相信好多媽媽都會感同身受。
 
初生嬰兒平常除了吃睡拉之外～ 最多出現的情況就是哭 通常一哭便是大哭（有時侯見到BB大哭，

媽咪都會想跟著一起哭~因為自己已經休息不夠～又不知道BB哭什麼，每日都進入餵奶換片餵奶換片嘅無限輪迴之

中真係人都顛呀！）
 
不過大家有無想過BB為什麼會哭呢？ 初生嬰兒的哭泣是他們的語言， 他們可能在告訴我們﹕

我餓啦！要換片啦！

想人抱下鬆一鬆換一換姿勢啦！

我要安全感呀！我覺得熱呀！我覺得凍呀！等等.....

還有一樣比較難察覺的就是身體不適，'colic 腸胶痛' 
 
很多初生嬰兒都有腸絞痛的問題～ 對於怎樣形成，醫生都沒有一個結論。

當我找不到BB哭泣的原因，我就觀察一下BB有沒有肚仔脹～肚風多唔多～
 
當我懷疑BB有腸絞痛、肚風、便祕等等的腸胃不適，就會利用按摩幫佢舒緩～ 按完或者按摩中的時候，

通常都會聽到BB放好多屁～ 

我就覺得好爽！

 
不過大家進行按摩都要看時候， 我們要在BB安靜清醒的時候才可以進行按摩。 

如果在BB身體不適、肚餓、剛食飽、哭鬧中，就不適合按摩了。

這些時侯進行按摩有可能帶來反效果，甚至令BB抗拒按摩喔。
 
NuNu而家仲有幾日滿月～ 由帶他回家那天開始，我就開始了我嘅無限輪迴，已經分唔清日頭定夜晚，

每日密密餵、密密換。雖然照顧初生BB真的很忙，但是差不多每日都總有合適的時間做按摩！ 

只要往積極的方向想，幫得到BB按摩可以舒緩到BB的生理不適之餘，又可以幫助BB放鬆心情。 

照顧BB的時侯自然會慢慢變得輕鬆一點~ 

我每次幫BB按摩，自己的心情都得以舒緩～ 對我自己減壓都好有幫助！

 
要了解一樣新事物，開始時會有機會面對種種困難，但只要認清目標，態度積極，一定可以克服的! 
 
各位新手爸媽努力呀！跟自己的寶貝好好認識！好好了解一下吧！

NuNu & Me — 大家好

大家好～ 小弟正式同大家見個面先～我叫NuNu~ 我終於出咗世喇！ 呢個月我會霸住媽咪～ 同媽咪建立關係同默契～ 8月先還返媽咪俾你哋上堂啦～ 媽咪話同我哋一家三口同月出世嘅BB（6、7、8月）有優惠喎～ 有興趣就message媽咪啦～
*d相係咪好靚呢～ 係媽咪嘅朋友影ga~ 你哋有興趣可以去auntie Maria個page睇下ga~ Maria Z Photography

俾多張有爸爸嘅靚相俾你睇啦~~

嬰兒按摩對父母好處多?

最近，大家對嬰兒按摩的關注及認知比以前多。很多家長都有基本概念，知道按摩對孩子身心發展的益處，如刺激腦部發育、幫助睡眠、安定情緒、幫助增重、增加安全感、刺激大小肌發展……但對父母的好處，你又知道多少？
1. 建立良好而緊密的親子關係
在按摩的過程，父母跟寶寶不論身體或心靈上有最親密接觸及良好的溝通。爸媽學會觀察BB，慢慢學習到聆聽寶寶的重要性，當了解BB的需要及情緒反應，會更懂得溝通，為良好的親子關係打好基礎。
其實，寶寶一出生就可進行按摩，當然按摩初生嬰兒的手法會有所不同。有些媽媽待產時就已經上嬰兒按摩班，待孩子出生便用上這些技巧，對育嬰很有幫 助。一般課程都適合0至1歲寶寶參加，不過要留意的是隨.孩子歲數愈大，活動能力愈強，穩定性就會降低，會較難習中上課。但只要家長有耐心，一般都影響不 大。

嬰兒按摩可刺激BB 腦部和神經發展，對他們日後的發展大有幫助。

2. 培養照顧寶寶的信心
很多新手父母，多了個寶寶是個前所未有的挑戰。按摩時，家長能透過課堂分享及按摩知識，觀察到平日忽略的細節，幫助建立自信，照顧寶寶時更得心應手。雖然 市面上，有很多流通的嬰兒資訊，只要Google一下或去圖書館，就有很多有關嬰兒按摩的知識，但國際嬰兒按摩協會不建議父母上網、看書自學，或者導師拍 片授課。因看似簡單，但當中有些技巧，若掌握不好可能會導致反效果。最常出現的問題，是由安撫情緒變為刺激情緒。根據筆者過往經驗，很多家長在課堂中都會 有很多提問，老師都可以直接回應，解決疑難，家長之間亦可交流心得，不論實用性或趣味都是自學不能相比的。

3. 幫助紓緩情緒
按摩除可令寶寶紓緩情緒，爸媽也可紓緩照顧上的緊張或不安感。特別對媽媽的影響更為重要。因由懷孕起，身體的賀爾蒙不斷變化，到產後要給身體一些時間去慢 慢調節。身邊人的關懷有重大幫助外，進行按摩時，身體會產生令人紓緩的賀爾蒙(Oxytocin)，可令人心情放鬆。對受情緒影響的媽媽，有極大的幫助， 並使賀爾蒙盡快回到正常水平，而這種Oxytocin對爸爸同樣有減壓作用。
我會建議每天按摩一次，提升孩子睡眠質量，有助增強免疫力。至於，按摩時間其實並沒有特定。主要視乎寶寶的狀態，只要是安靜清醒時都可進行。上班族父母，通常到家已7、8點，故不妨以按摩作為親子活動，只需15分鐘，便可享受Quality的親子時間，一舉兩得！

4. 改善睡眠
按摩不但可提升寶寶睡眠質素，原來爸媽都可受惠。由於賀爾蒙的影響，如寶寶睡得好，減少半夜起床的次數，父母相對地也可得到充分的休息時間。
5. 增進夫妻感情
爸爸媽媽為小寶寶按摩的同時，也增加雙方溝通的機會，增加彼此間愛的感覺，相方可分擔照顧BB的重任，有伴侶一同分擔及支持，心情、感情自然好。嬰兒按摩 的好處很多，但不是「仙丹」， 要視乎父母花多少時間，跟去做Laser去斑美容療程完全不同。父母需要有耐性及愛心，每天持之以恒，一般生理上的好處都會很快出現，要明白心理上的好處 及跟父母的關係影響，是有永久效用呢！因此，無論是上課或在家幫BB按摩，每次都是家長學習的好時機，理解嬰兒的成長、習慣、性格，培養自己耐性，而最重 要是學習聆聽子女（這是大人最易忽略的）。

Kenix Lai
現為國際認可嬰兒及兒童按摩導師。自小立志要做稱職主婦及好媽媽。原在私人飛機公司任職，公餘不斷進修嬰幼兒教育與健康課程（如：高級私人健身教練執照、 產前產後體適能教練證書、產前產後按摩證書、催乳按摩證書等……）希望能夠藉着嬰兒按摩推廣工作，幫家長分擔生活中喜與憂，讓每個大人小孩都有健康愉快的 家庭生活！

怎樣選擇您的嬰兒按摩班??

如果大家有睇開<<Sunday Kiss>，夠眼利都可能留意到今期有關嬰兒按摩嘅訪問，同埋見到小妹個樣~^.^~

呢幾日我都收到好多EMAIL或者message詢問有關嬰兒按摩班嘅詳情。亦都有朋友幫媽媽group嘅朋友問我同出面$100四堂，每堂一個鐘嘅嬰兒按摩班有咩分別。

老老實實~~其實有咩分別我未必可以答到你~(因為我無需要出去上堂^.^呵呵) 不過都可以教你分辨一下點樣去選擇最適合你嘅嬰兒按摩班！

一. 場地
教育中心或者私人機構
有d嬰兒按摩班會喺一d教育中心或者私人機構舉行。如果喺呢d地方上堂，好處係通常呢d地方設備充足，但係家長都要留意場地衛生情況，有否定時消毒；冷氣是否有恆溫或可否調較溫度。

家中
家中上課可以節省家長同bb嘅來回交通及準備出門時間同功夫。而且對初生寶寶嚟講，屋企係最有安全感嘅地方，喺熟識嘅地方上堂BB情緒會比喺陌生地方上堂穩定。而且上課期間，BB肚仔餓，媽媽餵食都方便D；場地亦無時限，有責任感嘅導師都會教識父母先落堂，唔需要趕住走，學到天一半地一半；亦都無需擔心衛生問題。省時便利又放心！

屋苑會所
香港寸金尺土，大部份打工仔都係住喺小蝸居，未必方便在家中上課~ 而且又想同其他媽媽一齊上堂，屋苑會所亦係一個唔錯嘅選擇。地點近屋企，唔需要舟車勞頓之餘，地方又夠大，而且場租亦化算。可以有多D爸爸媽媽一齊上堂分擔場租之餘，仲可以互相交流，輕鬆愉快！

二. 導師
國際認可專業資格
嬰兒按摩喺香港發展未及外國普遍，家長若要選擇導師，建議可查問導師資格。擁有國際資格或專業醫護較為可靠。

專業操守
市面上有一D所謂受過"相關訓練"嘅陪月員或者所謂"嬰兒按摩師"出現，佢哋會親手幫BB按摩；不過唔講唔知，原來合資格嘅嬰兒按摩導師係絕對唔會幫人哋嘅BB按摩（我知我講過，不過好多新媽媽爸爸唔知ga ma^.<）有操手嘅導師係會用示範公仔做示範~唔會剝奪父母同bb嘅親子時間ga！ 

三.課堂內容
課堂中，除咗教授安全正確嘅嬰兒按摩手法之外，仲會教授父母認識BB行為狀態嘅分別、BB哭泣嘅原因等等一D同BB溝通嘅技巧。因為內容充實，而已要預留時間俾BB休息，所以一般課堂需要1小時15分鐘至1小時30分鐘。 如果只有45-60分鐘可能會較為趕少少，未必夠大家去完全感受到嬰兒按摩嘅好處喇~~

另外，課堂亦會大約一星期上一堂，唔會一次/一日/連續幾日上完整個課程。因為全套手法及當中一D理論，並不能一氣呵成咁塞哂落父母個腦。學習係需要時間去消化、理解及掌握。有責任感嘅導師又點會當父母係填鴨呢?


其實嬰兒按摩嘅好處，除咗幫助到BB舒緩某D生理不適同刺激身體發展之外，喺我心目中最大嘅好處係令父母學習聆聽小朋友嘅需要，為建立良好嘅親子關係踏出重要嘅一步。

所以大家如果有興趣學嬰兒按摩嘅話要小心選擇導師，一個好嘅導師會想盡辦法令父母們感受到嬰兒按摩嘅好處， 以上幾點，希望可以幫助各位父母參考。

大家如果仲有一D有關嬰兒按摩嘅問題，歡迎去我facebook留言或者 send Inbox Message俾我ga ~^.^~ www.facebook.com/bilibama

骨精班~~

時間過得真係快~上星期四又完成一班嬰兒按摩班。

呢班我可以話係骨精班，第一次見到全班BB都咁鍾意按摩。

 一嚟BB全部都係2個月大~ 未到周身郁無時停嘅階段。第二就係daddy mami都係好好嘅按摩師，按到BB好享受。

 其實好多爸爸都好細心，用心幫BB按摩之餘重好認真學習!

BB都好享受呀~

 比較細個嘅BB有時都可以瞓喺爸爸媽媽大脾上按摩，當然要注意安全呀~

 媽咪手勢都唔錯ga~

呢班有三女一男~ 呢個小弟好鍾意望妹妹呢~~



其實學/開始嬰兒按摩嘅最佳時期就係兩三個月大~ BB比較容易控制，父母較容易掌握。早d開始對父母同BB嘅好處會更加多呢~~

Facebook page: www.facebook.com/bilibama

早產及特別需要嬰兒按摩的好處(上)

上星期五同尋日完成咗我期待已久，由國際嬰兒按摩協會(香港分會)舉辦嘅，「早產嬰兒按摩課程」同「特別需要嬰兒按摩課程」，再一次打開我嘅眼界！上完呢一堂，我真係無辦法唔落力D去推廣嬰兒按摩。因為TOUCH嘅力量真係太大喇！

每個父母都希望自己BB健健康康，可以俾哂最好嘅嘢佢哋。但係如果屋企有早產嬰兒或者特別需要嘅BB，我哋可以做D咩呢?

現今，早產BB一出世，就會有醫院嘅專業醫護人員盡力照顧，但係好多時父母就會有一種無奈，因為佢哋唔知自己可以為BB做D咩。

嬰兒按摩對早產嬰兒有咩幫助呢? 

外國有硏究顯示通過嬰兒按摩可以幫助BB增重，〈可參考： http://www.ncbi.nlm.nih.gov/pmc/articles/PMC2844909/ ），換句話說，係可提早出院時間，而且可以促進BB身體器官發展。而且唯一可以幫BB做呢樣咁重要嘅工作嘅人就只有父母。其他人做，係唔會有父母親手做嘅效果。

BB會聞得出爸爸媽媽熟識嘅氣味、皮膚嘅溫度及觸感，每一下接觸都無俾BB嘅支持。所以父母們千祈唔好睇少自己，你哋對BB嘅接觸同愛係絕對俾到BB生存嘅力量！PEOPLE CANNOT SURVIVE WITHOUT TOUCH！

喺外國，例如澳洲、瑞典呢D地方，佢地嘅醫院除咗一般醫護人員，佢哋仲有一個部門叫NIDCAP (Newborn Individualized Developmental Care and Assessment Program)，佢哋嘅其中一個作用係喺醫院中觀察新生嬰兒嘅情況，為父母及家人給予關心及支持，而NIDCAP係需要經過深入培訓。我嘅老師喺嚟自瑞典，佢分享咗喺佢哋嘅醫院除咗NIDCAP之外，嬰兒按摩導師都可以喺醫院出入，為一D有需要嘅父母提供意見、推廣嬰兒按摩，甚至教父母幫BB做按摩。 

香港喺呢人方面比較保守，而且醫院人流比外國嘅多，現階段，父母未必可以好快咁接觸到呢一類型嘅support。希望有一日可以發展到外國咁，可以俾到父母多d support，而家只可以靠大家幫我share下呢d information等多d人認識同了解呢樣嘢。

大家都可以睇下下面條片，感受一下 "The Power of Touch"

**不過大家記住，早產嬰兒喺醫院並不可以自由活動，佢哋身上可能有好多儀器，而且佢哋發育未完成，所以不適合一般嘅按摩，家長如果想嘗試，一定要請教有關人仕嘅專業意見，以免適得其反。

有需要或興趣了解同認識多d有關嬰兒按摩嘅資訊嘅朋友，歡迎您send個email俾我或者like我嘅facebook page: www.facebook.com/bilibama 

遲d再同你哋講下嬰兒按摩對特別需要嘅BB嘅影響。

 

小小付出，帶嚟大大嘅改變 -- 母親的抉擇家庭慈善步行日

星期日唔瞓晏d，又一朝早起身向半山進發~~搞咩呢?

就係去支持首屆 「母親的抉擇」家庭慈善步行日!!~~







今日同平時幫母親的抉擇，最唔同嘅就係，平日做義工，我通常接觸嘅係一d需要被照顧或者一d等待永久家庭嘅嬰兒/小朋友。但係今日活動上我接觸嘅，有好大部份都係一d領養家庭同佢哋嘅小朋友。雖然我之前並未有見過今日嘅小朋友，但今日見到佢哋，我知道佢哋每一個都好幸福，每一個小朋嘅臉上，都掛住幸福嘅笑容，都有一個好快樂嘅家庭。

但係我知道並不是必然。 

母親的抉擇呢個機構，喺1987年開始，為一d意外懷孕少女喺最徬徨、最恐懼嘅時候，伸出援手，幫助少女為自己作出最適合佢哋嘅選擇。令到佢哋喺呢段咁艱難嘅時期，下每一個勇敢抉擇時，都得到關心及支援。

當中，有一d少女未必有一個合適嘅家庭環境及能力去親自撫養佢哋嘅BB。而母親的抉擇就擔當咗一個非常重要嘅角色，佢哋會為嬰兒提供照顧，直到父母合適照顧嘅時候再交還。或者，為一D嬰兒或小朋友安排領養，喺等待領養其間，母親的抉擇會照顧呢D小朋友，令到佢哋有家嘅感覺，直至為佢哋搵到一個永久家庭為止~

今日我見到嘅，就係一D因為母親的抉擇而受惠嘅小朋友及家庭。如果無母親的抉擇呢個機構，喺香港會多幾多因為意外懷孕而衍生嘅悲劇?

過去共有:

51,000 名面對意外懷孕的少女獲「母親的抉擇」提供所需輔導及暫時居所

510,000 名青年及家長獲「母親的抉擇」提供性教育及有關培訓 

母親的抉擇嘅團隊除咗員工之外，其實仲有一班強大嘅義工團隊，當中有專業人仕、煮婦、學生、在職人仕等等~ 

我哋會幫助做一D倡導及教育工作、行政支援工作、當然唔少得嘅就係幫忙照顧喺幼兒之家嘅小朋友。 

聽落好似做做義工嘅人付出好多，但係喺義務工作中，我嘅得著更大。

例如，有時工作壓力大、心情唔好又或者嬲嬲哋.....如果嗰一日要去幼兒之家，呢D煩惱通常都無哂~ 因為每個星期我都好期待去照顧呢班小朋友，由佢哋未識爬~到識坐~跟住識企~到識行，每個星期去我都好期待見到佢哋有一D新鮮嘢~古靈精怪嘅行為。 所以由我搭車開始已經忘記哂自己嘅煩惱。 ^.^ 

同埋，由做義工開始，我深深體會到家庭對小朋友係咩嘢一回事~ 血緣關係並唔係最關鍵，而係人與人之間嘅關係、關心，對小朋友最重要嘅係用心嘅照顧。一個幸福家庭亦都唔係必然，有D人可能要被迫同自己小朋友分離，或者自己想要小朋友但係因為好多因素而未能如願。 

但係我哋嘅一個決定，一D時間，完來足以令到我哋幫助到其他人，出小小力就可以改變到其他人嘅一生。

 

雖然母親的抉擇已為社會中數千生命帶來改變，但香港對預防及處理意外懷孕嘅需要卻有增無減。貝恩咨詢公司 (Bain & Company) 近年一義務調查顯示， 香港每年約有6,880宗意外懷孕個案， 且大部分均為 25歲以下的意外懷孕少女。

希望大家睇完我呢篇又長又乜乜乜嘅文，可以更加珍惜自己嘅家庭，有能力嘅你可以加入做佢哋嘅義工又或者可以捐款令母親的抉擇可以幫助到更多有需要嘅人，藉住小小嘅付出，為社會帶嚟大大嘅改變。 

 雖然佢哋地址喺半山，其實只係因為政府以HKD1租俾佢哋，而佢哋嘅地點又喺斜坡，加上建築已經有一百年歷史，為咗人命安全，佢哋要付責埋高昂嘅斜坡維修及建築物維修費，對佢哋都係一個十分大嘅負擔。

如果大家有興趣了解，可以去佢哋嘅網頁:

http://www.motherschoice.org/about-us/who-we-are/financials/ 

又或者睇下以下呢個真實嘅故事：

 

http://blogs.christianpost.com/every-child/to-show-love-23436/

Joining hands with our community to transform lives and give hope.