骨精班~~

時間過得真係快~上星期四又完成一班嬰兒按摩班。

呢班我可以話係骨精班，第一次見到全班BB都咁鍾意按摩。

 一嚟BB全部都係2個月大~ 未到周身郁無時停嘅階段。第二就係daddy mami都係好好嘅按摩師，按到BB好享受。

 其實好多爸爸都好細心，用心幫BB按摩之餘重好認真學習!

BB都好享受呀~

 比較細個嘅BB有時都可以瞓喺爸爸媽媽大脾上按摩，當然要注意安全呀~

 媽咪手勢都唔錯ga~

呢班有三女一男~ 呢個小弟好鍾意望妹妹呢~~



其實學/開始嬰兒按摩嘅最佳時期就係兩三個月大~ BB比較容易控制，父母較容易掌握。早d開始對父母同BB嘅好處會更加多呢~~

Facebook page: www.facebook.com/bilibama

早產及特別需要嬰兒按摩的好處(上)

上星期五同尋日完成咗我期待已久，由國際嬰兒按摩協會(香港分會)舉辦嘅，「早產嬰兒按摩課程」同「特別需要嬰兒按摩課程」，再一次打開我嘅眼界！上完呢一堂，我真係無辦法唔落力D去推廣嬰兒按摩。因為TOUCH嘅力量真係太大喇！

每個父母都希望自己BB健健康康，可以俾哂最好嘅嘢佢哋。但係如果屋企有早產嬰兒或者特別需要嘅BB，我哋可以做D咩呢?

現今，早產BB一出世，就會有醫院嘅專業醫護人員盡力照顧，但係好多時父母就會有一種無奈，因為佢哋唔知自己可以為BB做D咩。

嬰兒按摩對早產嬰兒有咩幫助呢? 

外國有硏究顯示通過嬰兒按摩可以幫助BB增重，〈可參考： http://www.ncbi.nlm.nih.gov/pmc/articles/PMC2844909/ ），換句話說，係可提早出院時間，而且可以促進BB身體器官發展。而且唯一可以幫BB做呢樣咁重要嘅工作嘅人就只有父母。其他人做，係唔會有父母親手做嘅效果。

BB會聞得出爸爸媽媽熟識嘅氣味、皮膚嘅溫度及觸感，每一下接觸都無俾BB嘅支持。所以父母們千祈唔好睇少自己，你哋對BB嘅接觸同愛係絕對俾到BB生存嘅力量！PEOPLE CANNOT SURVIVE WITHOUT TOUCH！

喺外國，例如澳洲、瑞典呢D地方，佢地嘅醫院除咗一般醫護人員，佢哋仲有一個部門叫NIDCAP (Newborn Individualized Developmental Care and Assessment Program)，佢哋嘅其中一個作用係喺醫院中觀察新生嬰兒嘅情況，為父母及家人給予關心及支持，而NIDCAP係需要經過深入培訓。我嘅老師喺嚟自瑞典，佢分享咗喺佢哋嘅醫院除咗NIDCAP之外，嬰兒按摩導師都可以喺醫院出入，為一D有需要嘅父母提供意見、推廣嬰兒按摩，甚至教父母幫BB做按摩。 

香港喺呢人方面比較保守，而且醫院人流比外國嘅多，現階段，父母未必可以好快咁接觸到呢一類型嘅support。希望有一日可以發展到外國咁，可以俾到父母多d support，而家只可以靠大家幫我share下呢d information等多d人認識同了解呢樣嘢。

大家都可以睇下下面條片，感受一下 "The Power of Touch"

**不過大家記住，早產嬰兒喺醫院並不可以自由活動，佢哋身上可能有好多儀器，而且佢哋發育未完成，所以不適合一般嘅按摩，家長如果想嘗試，一定要請教有關人仕嘅專業意見，以免適得其反。

有需要或興趣了解同認識多d有關嬰兒按摩嘅資訊嘅朋友，歡迎您send個email俾我或者like我嘅facebook page: www.facebook.com/bilibama 

遲d再同你哋講下嬰兒按摩對特別需要嘅BB嘅影響。

 

小小付出，帶嚟大大嘅改變 -- 母親的抉擇家庭慈善步行日

星期日唔瞓晏d，又一朝早起身向半山進發~~搞咩呢?

就係去支持首屆 「母親的抉擇」家庭慈善步行日!!~~







今日同平時幫母親的抉擇，最唔同嘅就係，平日做義工，我通常接觸嘅係一d需要被照顧或者一d等待永久家庭嘅嬰兒/小朋友。但係今日活動上我接觸嘅，有好大部份都係一d領養家庭同佢哋嘅小朋友。雖然我之前並未有見過今日嘅小朋友，但今日見到佢哋，我知道佢哋每一個都好幸福，每一個小朋嘅臉上，都掛住幸福嘅笑容，都有一個好快樂嘅家庭。

但係我知道並不是必然。 

母親的抉擇呢個機構，喺1987年開始，為一d意外懷孕少女喺最徬徨、最恐懼嘅時候，伸出援手，幫助少女為自己作出最適合佢哋嘅選擇。令到佢哋喺呢段咁艱難嘅時期，下每一個勇敢抉擇時，都得到關心及支援。

當中，有一d少女未必有一個合適嘅家庭環境及能力去親自撫養佢哋嘅BB。而母親的抉擇就擔當咗一個非常重要嘅角色，佢哋會為嬰兒提供照顧，直到父母合適照顧嘅時候再交還。或者，為一D嬰兒或小朋友安排領養，喺等待領養其間，母親的抉擇會照顧呢D小朋友，令到佢哋有家嘅感覺，直至為佢哋搵到一個永久家庭為止~

今日我見到嘅，就係一D因為母親的抉擇而受惠嘅小朋友及家庭。如果無母親的抉擇呢個機構，喺香港會多幾多因為意外懷孕而衍生嘅悲劇?

過去共有:

51,000 名面對意外懷孕的少女獲「母親的抉擇」提供所需輔導及暫時居所

510,000 名青年及家長獲「母親的抉擇」提供性教育及有關培訓 

母親的抉擇嘅團隊除咗員工之外，其實仲有一班強大嘅義工團隊，當中有專業人仕、煮婦、學生、在職人仕等等~ 

我哋會幫助做一D倡導及教育工作、行政支援工作、當然唔少得嘅就係幫忙照顧喺幼兒之家嘅小朋友。 

聽落好似做做義工嘅人付出好多，但係喺義務工作中，我嘅得著更大。

例如，有時工作壓力大、心情唔好又或者嬲嬲哋.....如果嗰一日要去幼兒之家，呢D煩惱通常都無哂~ 因為每個星期我都好期待去照顧呢班小朋友，由佢哋未識爬~到識坐~跟住識企~到識行，每個星期去我都好期待見到佢哋有一D新鮮嘢~古靈精怪嘅行為。 所以由我搭車開始已經忘記哂自己嘅煩惱。 ^.^ 

同埋，由做義工開始，我深深體會到家庭對小朋友係咩嘢一回事~ 血緣關係並唔係最關鍵，而係人與人之間嘅關係、關心，對小朋友最重要嘅係用心嘅照顧。一個幸福家庭亦都唔係必然，有D人可能要被迫同自己小朋友分離，或者自己想要小朋友但係因為好多因素而未能如願。 

但係我哋嘅一個決定，一D時間，完來足以令到我哋幫助到其他人，出小小力就可以改變到其他人嘅一生。

 

雖然母親的抉擇已為社會中數千生命帶來改變，但香港對預防及處理意外懷孕嘅需要卻有增無減。貝恩咨詢公司 (Bain & Company) 近年一義務調查顯示， 香港每年約有6,880宗意外懷孕個案， 且大部分均為 25歲以下的意外懷孕少女。

希望大家睇完我呢篇又長又乜乜乜嘅文，可以更加珍惜自己嘅家庭，有能力嘅你可以加入做佢哋嘅義工又或者可以捐款令母親的抉擇可以幫助到更多有需要嘅人，藉住小小嘅付出，為社會帶嚟大大嘅改變。 

 雖然佢哋地址喺半山，其實只係因為政府以HKD1租俾佢哋，而佢哋嘅地點又喺斜坡，加上建築已經有一百年歷史，為咗人命安全，佢哋要付責埋高昂嘅斜坡維修及建築物維修費，對佢哋都係一個十分大嘅負擔。

如果大家有興趣了解，可以去佢哋嘅網頁:

http://www.motherschoice.org/about-us/who-we-are/financials/ 

又或者睇下以下呢個真實嘅故事：

 

http://blogs.christianpost.com/every-child/to-show-love-23436/

Joining hands with our community to transform lives and give hope.

 

師奶潛能 無嘢係無可能

我而家體重95磅，身高5呎1吋....好似...差半cm.........
平時老公唔叫，我未必會做家務...因為我阿媽照顧得我太好~ 我以前喺屋企最多都係洗下碗~其他好似真係無咩要做~ 所以而家都唔係好積極做...家...務........哈哈

拖完地、掃完地，都用盡我嘅體力...(我已經覺得攞咗我條命......鬼叫自己細粒...地拖棍同我差唔好高....)

但係有一樣嘢我係好積極嘅~ 就係煮嘢食~~

煮一餐飯一d都唔簡單!每餐飯簡直都係挑戰我嘅人體極限!!!!

就好似今日咁~~~~~~~~~

首先，去街市前，順路去拎返星期二要著嘅姊妹裙~ 再出發去街市~

去到街市，先剷上菜檔，見到粟米抵先買兩條~ (10蚊2條)~

再去山草藥檔問下叔叔有咩靚~秋風起、三蛇肥~天氣乾燥，想煲d清潤嘢飲下~

跟住就買咗天山雪蓮~ 鮮百合~竹蔗~ 再去雜貨檔買黑醬油，花雕酒~~買完就去豬肉檔買咗兩斤唐排~~(知唔知我整咩呢~^.^~???)

跟住醒起屋企無盒裝紙巾、祙手紙、生抽同米~就去咗超級市場入貨~

計一計買咗d咩嘢先: 粟米兩條+天山雪蓮一個+鮮百合一包+竹庶工三條+黑醬油一支+花雕酒一支+生抽一支+唐排兩斤+米2kg x 2+祙手紙+紙巾

買到呢度，我無實質磅過d嘢有幾重，估計.... (一得個八，八我個十)，都有最少25磅~ (今次唔算多ga lar..)

 平時d男人要大隻就話高重量舉8下做幾set啫....平時喺屋拎起呢個唖鈴一下都舉唔起....

真係唔知何來嘅力氣，每次買親餸都可以上咗身咁拎到咁重~~

所以話呢~~各位老公大人們~ 你哋真係唔好睇少一餐飯~ 每一餐飯無血都有汗ga~ 如果係姐姐煮都唔好咁老奉呀~~~

最後呢d就係今日嘅製成品喇~~~ (我手仲震緊....)

美味肉骨茶~

清潤天山雪蓮百合粟米竹蔗水~~


所以話  師奶潛能 無嘢係無可能~~~~~~~

我阿B食腳指~

個個小朋友都有食腳指嘅經驗。包括你同我 ("~.~ )

你哋嘅小朋友幾多個月開始食腳指呢?

 

其實食腳指，手指同本體感覺好有關係0架~

本體感覺指嘅係肌肉收縮與伸張、屈曲、伸直、推拉，以及兩條骨骼間關節壓縮所引起嘅感覺資訊。運用來自肌肉、關節、骨骼等較為深層組織嘅感覺，可以幫助人感覺來自身體嘅各種訊息，告知大腦目前身體所處的姿勢型態與生理狀況。

例如唔用眼睛睇，就可以上樓梯；唔照鏡，就可以摸到鼻哥；唔洗睇就可以整熄個鬧鐘，呢d都係本體感作用嘅結果。

如果本體感失調會點呢?

有本體覺障礙嘅小朋友我地會見到以下情況：
本體感不足嘅小朋友，動作記憶較差(甚至明顯差好多)、成日企得'pea'下'pea'下、散漫；與人交談、上課發言時，會口吃、情緒唔好；不識自己著衫、扣鈕，比同年齡的兒童慢好多。

亦會出現唔識控制力道，拎物件、握手、掉波會過於用力；容易撞到嘢。(我講嘅係物件，唔係嗰D嘢~~~~~)、容易跌到、唔識行樓梯等等......

所以，家長需要多俾小朋友自由活動嘅機會。

可以適當地俾小朋友喊下，等小朋友感受自己唔同嘅音調、音量，令大腦神經同聲帶肌肉聯繫起嚟。
如果BB係用奶樽，俾BB嘅奶嘴嘅隆唔好太大，令孩子通過吸、咬等動作訓練口腔肌肉；BB都鍾意食手，一開始食自己嘅拳頭，後來是手指，由4隻手指，吃到1隻手指，甚至食腳指~~呢個情況係小朋友對自己身體感覺的分化，係一個過程，所以家長唔好俾咁多限制，避免阻礙佢哋自然發展呀~

除此之外，多D同BB按摩，多接觸佢哋嘅皮膚、大小肌肉都可以幫助刺激佢地嘅本體感同其他感覺統合發展0架~~家長們~放心俾佢哋認識自己嘅身體啦~~

答案揭曉~

之前講過為咗一份好有意義嘅工作做準備～仲令我好緊張～ 

而家成咗事~可以講喇~~我所講'好有意義嘅工作'就係加入咗Mother's Choice「母親的抉擇」嘅義務性教育導師團隊喇~

呢個就係Mother's Choice「母親的抉擇」嘅logo喇~~

「母親的抉擇」希望通過一系列嘅性教育講座，將正確嘅性知識、觀念灌輸俾青少年，減少香港青少年的意外懷孕數字並且幫助青少年建立正面的自我價值觀、鼓勵及建立責任感及個人目標、灌輸尊重自己及他人的觀念。

除咗倡導及教育方面，你又知唔知「母親的抉擇」嘅服務範圍包括d咩呢?

主要有以下四大服務：

一. 意外懷孕支援服務
我們與意外懷孕的少女共同面對，為她們提供關愛及全面的支援服務，讓她們有能力為自己及未出生的孩子作出負責任的抉擇。

二. 領養服務
我們與社會福利署攜手合作，為孩子於香港尋找關愛他們的永久家庭，並與三所海外機構為有特殊需要的孩子尋找永久家庭。

三. 幼兒之家 我們為嬰幼兒及有特殊需要的兒童提供居所，並在他們等待永久家庭其間提供護理及關愛。

四. 寄養服務 我們為需要暫時寄養的兒童提供安穩關愛的家庭環境，並致力為每個寄養兒童訂立長久計畫。

我加入咗「母親的抉擇」嘅義工團隊都有一段時間，每個星期都好期待去做義工嘅日子，因為每次都覺得好快樂，而嗰種快樂全部都係小朋友帶俾我嘅。好多人一開 始都會覺得自己可以俾到d乜乜乜小朋友 (離一離題先...我而家一見到、聽到、諗到'乜乜乜'呢幾個字就諗起榴槤...)，但係後來會發現最有得著嘅係自己。

如果大家想了解多d「母親的抉擇」可以去佢哋嘅網頁，了解下佢哋嘅服務。

同埋嚟緊嘅11月2號，佢哋會舉辦一個'walkathon'，有興趣嘅朋友可以去下面條link睇下同登記
 報名ga! 


http://events.motherschoice.org/walkathon2014/en/

Cheers~~

親子伴讀 輕鬆學習 http://bilibamaimb.blogspot.com/

上星期我去做義工嘅機構安排咗一個講故事嘅training俾我

我就喺咁認識咗"菜姨姨" (係人嚟ga 唔係菜)

課堂中，我哋要練習用唔同嘅語氣講同出一個書名

<<媽媽的小褲褲>>

<--就係佢



不如大家都試下~

1.   開心興奮的語氣
2.   肯定的語氣
3.   憤怒的語氣
4.   哀傷的語氣
5.   男人的語氣
6.   女人的語氣
7.   老人的語氣
8.   小孩 的語氣
9.   懷疑的語氣
10. 恐怖的語氣

我做完之後，發覺俾人望住自己咁整古做怪其實都好好笑 (特別係睇人哋做..哈哈)
但同時~~亦都感受到原來只要簡單嘅說話，不同嘅語氣就可以帶出不同嘅氣氛同歡樂。

有好多媽咪爸爸會覺得唔知點講先好聽~ 又或者一早覺得自己講得唔好聽而選擇掉本書俾小朋友自己睇~

但係你地要知道，呢個係好大嘅損失嚟ga~(講故事mode on)

因為親子伴讀可以增長知識--> 知識能增加聰敏--> 聰敏能助發展美好前途。

教育家積極支持閱讀及講故事能：

• 刺激想像力
• 建立深層概念上的了解
• 增加孩子的詞彙
• 讓孩子認識故事的結構與組織，如人物性格、情節
• 幫助孩子了解他們身邊的世界
• 加強親子關係

 

你哋又知唔知幾時可以開始閱讀呢?

 由出生可以喇！孩子腦部發展嘅重要時期係喺出生至四歲之間 –當孩子在四歲時，他們的腦部發展已達至九成了。然而，無論幾時開始為孩子朗讀都永遠唔會太遲，因為佢哋嘅腦部仍不繼發展、成長及完善，即使長大成人，腦部仍然會不斷變化。好似massage咁~

同BB仔讀書點讀呀??

父母們首先要知道一點，同小朋友讀書唔係要教佢哋學識D字或者識哂D圖講咩~ 同BB讀書係可以通過聲音、語氣、身體接觸等幫助BB啟發學習、刺激增加腦部神經，幫助智力發展之餘更可以增進親子關係。所以爸爸媽媽同BB或者小朋友讀書時，先要TAKE IT EASY~

可以將BB抱身前~ 打開書本~ 發揮食哋嘅演戲天份~ 間中同BB有D眼神交流~ 間中停下先再繼續 (因為一歲前嘅BB，佢哋維持到3-5分鐘嘅專注力已經好叻，佢哋習中唔到唔係佢錯，父母要明白呢一點，佢地一唔習中就俾BB休息一陣，可以係10-30秒，慢慢減少)

有時BB會搶書~ 記住未必係佢哋唔乖~ 可能係因為佢地口腔期~或者佢哋專注力夠鐘又或者我哋講得敷衍悶親佢...哈哈.....大家要留意呀~

千祈唔好迫佢哋令佢哋討厭書本呀~

輕鬆學習 收穫更多

BB係唔應該有學習壓力GA~ 父母們自己不如都放鬆少少~同BB做D輕鬆嘅活動，唔一定要同其他人比賽先學到嘢GA~ 親子活動中得到嘅得著會更多~ 


對親子伴讀有興趣不妨去 書伴我行（香港）基金會嘅WEBSITE睇下~~

續 <圓圈加一點>--兒童按摩知多點^.^

今日終於得閒將之前條訪問upload上網喇~~~~~

大家可以去呢度聽返

https://www.youtube.com/watch?v=Czu4OP-9TGs&feature=youtu.be


兒童按摩對兒童的好處:

減低壓力水平;
改善專注力
幫助發展想象力;
了解每個人都有獨特之處;
增加對朋輩的尊重意識，關係更和諧
強化自信

除咗對兒童有好處之外，對父母，家庭，老師，學校，甚至整個社會都可以帶嚟正面影響。

以下係一條有關Child Massage/ Massage in School 嘅影片;希望你地睇完條片，聽完d小朋友嘅感受，你地可以feel到按摩對小朋友帶嚟嘅神奇效果。

希望有一日我可以將呢個咁好嘅活動帶到去每一間學校啦~~

去 片!!

https://www.youtube.com/watch?v=kJMVbnd2SNM




Picture from: Massage in Schools Association (EWNI) CIC

得來不易

  呢張cert終於到手喇~~~~~得來不易的一張cert.

以前一直唔敢去gym，因為好驚d器械，更驚d sales，所以健身呢兩個字一直離我很遠。直至我半年前quit咗aviation份工，為咗能夠分享多d有關身分心健康嘅知識俾父母知，我就報咗產前產後體適能教練同高級體適能教練課程。

初頭都係諗住揾d嘢讀下，自我增值下，但係讀完之後真係覺得學到嘅嘢對自己都好有用~特別而家我地條命長咗、生bb遲咗、經濟負擔大咗，我哋更加雖要一個健康嘅身體去陪住我哋，更加要注意健康。

好多媽咪同我分享佢哋產前嘅不適~ 又腰痛~ 又膝頭痛~ 又背痛~好似十個有八個都會咁，我哋以為係必然，原來唔係ga~ 原來好大原因係我哋平時缺乏運動/ 不當運動，姿態又唔正確，肌肉力量又唔平衡而導致嘅。

只要我哋喺產前產後做一d適當嘅針對性運動，係絕對可以減低及舒緩一d痛症，更可幫助保持身材添~~

另外運動有助減低壓力賀爾蒙，做完人都輕鬆d，開心d ^.^

既然，我得到呢張cert，我就會好好運用，好好繼續虛心學習，希望各位可以俾我感染，防範於未燃~~ 及早開始做運動，保持一個年青健康嘅身心啦~!!!!

十分鐘 十年功

今日去咗一件武林盛事

就係「adidas醒獅盃」2014醒獅運動精英爭霸戰



簡直係大開界!!!

其實我由細到大都唔鍾意睇醒獅，因為好嘈同埋好迫~
不過經過今日之後，我完全改觀!

今日見到咁多隊隊伍比賽，睇到喺平時d舖頭開張時不一樣嘅醒獅~

原來而家玩舞獅嘅師傅都好年輕~ 但係都功駕十足~ 
每一隊都十分精彩~ 佢地每一個動作都要十分精準~絕對不能出錯! 稍有失誤都會被扣分~ 而每一個小分都會影響勝負~



















可想而知出賽嘅朋友壓力有幾大~十二隊中當然有驚險場面出現，無論大跌小跌~大小失誤，各隊伍都盡自己最大能力去完成動作，呢一點係最值得加許! 完全體現到運動員精神!永不放棄!! 希望有受傷嘅朋友無咩大礙~ 快d好返!!

所謂"十分鐘，十年功"真係一d都無錯!

今日睇完改變咗我對舞獅嘅印象~亦令我對呢項活動增加咗尊重多咗份欣賞~
 (唔知係咪我以前有跳舞，所以我特別理解"十分鐘，十年功"呢句說話~)

如果大家有興趣認識健獅呢項咁有歷史咁有本土特色嘅活動可以去下面條link了解下~
《我不是師傅－－一代醒獅之路》




















 大家以後睇舞獅不妨大力d多俾d掌聲，支持下每位師傅喺背後所付出嘅努力~
  

<圓圈加一點>--兒童按摩知多點^.^

<圓圈加一點>--兒童按摩知多點^.^

尋日大家有無聽我同Utopia上新城電台<圓圈加一點>呢?

我今日無意再講返訪問內容(我先唔會咁悶,遲D先UPLAOD返條帶啦)~

而係想睇下你地有無留意到節目中有把小妹妹嘅聲音呢?

佢就係沛沛喇~ 呢個小朋友十分活潑精靈但係同時又'CONTROLABLE'~令到節目過程中大家都十分愉快~

佢仲話好掛住鹹蛋哥哥添~

其實見到沛沛~ 我就更加覺得唔係所有小朋友都一定成日打機睇YOUTUBE~ 無時定兼小霸王~

一個小朋友嘅生活習慣、待人接物、處事態度係點完全取決於父母同照顧者點對佢地。

沛沛媽媽好有心機、耐性去照顧同教導沛沛~ 自己有做得唔好嘅地方會反醒，會道歉。亦會俾自由空間沛沛，等沛沛學識自主~

我講就幾行字~其實做落真係唔易GA~當然沛沛從小就有俾媽媽按摩，所以關係一路都好親近~但係最緊要就係媽媽有同理心~ 會喺沛沛嘅角度思考，自己亦會做個好榜樣俾沛沛學習。唔會當個女係機器、電腦，唔容許出錯~成件事好人性化~(我好鍾意人性代呢三個字)

各位爸爸媽媽~你地平時又點樣管教自己嘅小朋友呢?

左起:新城電台主持人-Kelvin鹹蛋哥哥; Utopia同沛沛; 小妹kenix

Baby SPA?? 嬰兒按摩技師????

尋日同一班朋友食飯~ 其中一個問我有問baby spa嘅問題。

朋友：其實baby spa有咩好處?? 我朋友話佢地用個水泡笠住個頭，浸住水好過癮~ 跟住又有人幫bb按摩，摔下摔下咁~好似好爽~ 

香港嘅baby spa係由新加坡引入嘅，問心，我見到d相都覺得好得意，我又好中意做spa同按摩。

不過如果係for BB~喺咁美麗嘅包裝下，家長又要留意d咩呢?

其實baby spa 同嬰兒按摩並不是相對的 
做baby massage前無規定要做baby spa，而且bb游完水，體力消好完，並不適合做按摩。

上過堂同埋有幫bb按摩嘅父母都知道，按摩係要睇bb嘅狀態，bb疲倦係唔會同bb做按摩，以免bb over tired。 如果over tired 係會有機會令bb瞓得唔好，仲會有哭鬧嘅情況出現。大家要留意喇~



嬰兒按摩技師要小心!!
我又要講清楚俾大家聽。(我成日都講...) 只有父母可以做自己仔囡嘅按摩師。 做嬰兒按摩嘅其中一樣好處，係從小教bb有權say no (所以父母按摩前係要問bb攞permission ga)，慢慢bb就會學識如果無自己嘅批准，身體係唔可以俾別人隨便觸碰嘅。

而且一個有操手並且合資格嘅嬰兒按摩導師，係絕對唔會幫你嘅BB做按摩ga~
有d中心話佢地嘅員工有按摩證書，可以幫你bb按摩，咁你就要小心喇~

 以下係一篇嚟自新加坡有關babay spa同infant massage嘅文章，大家可以參考：       
 http://mypaper.sg/top-stories/take-baby-spa-your-own-risk-20140723


 而家好多商人為咗賺錢真係有好多方法。各位家長為小朋友作出任何選擇時，都應該真正為小朋友出發， 而且要多從小朋友角度思考，唔好因為過份期望而傷害到小朋友呀~

Facebook Page: BiliBaMa

新城電台訪問 <爸爸媽媽你好嗎>

小妹有幸於上月接受新城電台-----<爸爸媽媽你好嗎>訪問。大家有時間可以去以下連結聽下，希望你地對嬰兒按摩有多d認識啦~~~

(不過請原諒我d 'er.....er.....同er.......我自己都聽到煩...哈哈!!)

https://www.youtube.com/watch?v=CWAMxkPHsg0&feature=youtu.be

上門嬰兒按摩班的好處

今日有班要教~ 一早7點幾就起咗身準備，其實我尋晚成兩三點先瞓......

不過因為我習慣教班當日一定要做最後準備，而中午又有約，所以眼瞓d都要郁~~

今堂係上門班，我最鍾意嘅就係上門教。點解??

一. 因為上門教，唔洗趕時間交場而令家長學得放鬆d。
      有時BB有情緒都可以放心安撫，唔怕因為喊太耐而上唔到堂。

二. 自己地方，比較適應；爸爸媽媽亦無咁頻撲
      BB每去一個陌生環境都需要時間適應，但上課時間一般大約1-1.5小時。如果要小朋友完
      全適應，應該會花比較長時間，變相亦會浪費時間。
      而且帶BB出街亦比較多嘢搞，再帶出街其實真係好身心疲累ga.....(家長心聲)。如果喺屋
      企上堂就可以避免呢D情況。

三. 環境較衛生，大家都教安心
      上堂嘅BB由初生到12個月都有，BB學識轉身後更會四圍爬，外面嘅場地衛生情況較難控
      制，喺屋企上就放心喇~~

有興趣知多D除咗呢個BLOG，仲可以去我嘅FACEBOOK專頁:BiliBaMa Infant Massage 

用得其所~ 做個精明父母

update下先~ 上個星期去咗BB展去支持朋友嘅兒童按摩課程講座。順便行個圈，睇下有D咩嘢產品睇下，真係五花八門。我身為一個合資格嘅嬰兒按摩導師，都想俾D提示大家。因為我見到當中有D服務或產品同嬰兒按摩拉上關係。

1. 嬰兒按摩師???
嬰兒按摩嘅最大目的係希望父母同BB建立良好嘅BONDING同ATTACHMENT，每日都可以享受有質素嘅親子時間。 合資格嘅"嬰兒按摩導師"嘅職責係教導父母及照顧者正確嘅嬰兒按摩手法，

絕對!! 絕對!! 不會!!落手幫你地嘅BB按摩!!

所以各位要留意下，如果有D自稱"嬰兒按摩師"，有幫你BB按摩嘅服務，就要小心喇~ 因為喺合格嘅導師眼中，只有父母同照顧者係最佳嘅嬰兒按摩師，並不是工人姐姐、陪月姐姐或者其他父母同BB都唔認識嘅陌生人。

各位Daddy Mammy要審慎選擇啦~

2. 香薰嬰兒按摩油
上我堂嘅父母都知道點樣選擇按摩油俾BB。 而家喺度就講下俾未上堂嘅家長知啦~~

以下係要點：
1. 必須是冷壓製植物油
製作過程未有經過加熱程序，植物油不會因熱力而變質或製造有害物質，傷害BB皮膚。

2. 不含添加化學物質及香味
BB皮膚薄，較易受刺激。化學物質除咗會刺激皮膚及阻塞毛孔，更有機會會導致敏感。 而且嬰兒不適宜長期及入一D不天然味道，影響BB學習之餘亦會影響BB認爸爸媽媽嘅氣味。

所以，我地不宜選擇一D太香，氣味太重嘅按摩油及礦物油。香薰按摩油都係留反俾大人啦~

小朋友需要嘅嘢好簡單，佢地唔會要求你花好多錢喺佢地身上。佢地最需要嘅係父母嘅關心同耐心，希望各位爸爸媽媽可以留意。選擇最適合嘅俾BB而唔係俾自己 ^.<

 

健康小知識-- 運動篇

游水係好好嘅有氧運動～喺水中身體變輕～

 

有助減低因為懷孕或揍BB帶嚟嘅腰背壓力～唔識游水，浸下水都得㗎～

 

襯夏天，齊齊吸收下維他命D~放鬆下啦～

 

健康小知識-- 運動篇

父母除咗要幫BB按摩之外，平日要抱BB其實都好吃力～不過各位有冇留意抱BB嘅手勢同姿勢正唔正確呢？

只要花少少時間同耐性，原來可以避免一d揍BB常見嘅狀況～

照顧子女係一世嘅工作，當然要有好嘅體格～（講緊嘅當然唔係抱佢抱到18歲啦～）我地都希望自己身心健康，第時有機會享下福～

所以唔好懶惰！要適當運動～嚟緊等我介紹一d日常喺屋企都可以做嘅運動俾大家啦～

快D開心share俾有需要嘅朋友啦～

嬰兒按摩WORKSHOP

啱啱嘅星期六應邀去一班BB嘅六個月聚會~ 

同家長們簡單咁介紹一下嬰兒按摩~雖然時間唔多~不過希望可以令你知道嬰兒按摩嘅好處同埋體驗到當中嘅樂趣啦~~~

如果其他媽媽/媽媽會有興趣，歡迎隨時聯絡我GA

一位教師在女兒自殺後的教育反省

父 母每日辛勞工作帶給兒女的可能是出國機會、物質生活富足，但因為這些物質上的需求而忽略了兒女心靈上的發展帶來的影響是無人能夠預測的。 關心別人從來都不要在心中，愛你的親人就要說出口、做出來。 雖然可能是一個小小的舉動但效果有可能帶來的是生命的改寫。 是時候反思一下，想一想教育/養育兒女最重要的是什麼?孩子們最需要的是什麼? 

爸爸按摩

在職爸爸下班回家吃了晚飯後最有質量的親子活動~

 

嬰兒按摩

 

誰說爸爸沒有參與照顧小朋友~~看BB多享受按摩～

父母們都有個共通點～回到家中對著他們所愛的孩子，無論工作多累，多煩惱都會被拋諸腦後～

 

 

Sunday Kiss 專欄訪問-

這次是在sunnday kiss中鄭文媽媽的專欄出現~多謝鄭文媽媽的支持~希望更多工作繁忙的家長，能被你感染，像你一樣跟孩子多一些肌膚之親~

 

 

《BiliBaMa有問題》你哋覺得同理心係應該點樣去培養嘅呢？

答: 我會認為係『以身作則』

每個小朋友一出世，性格就先天決定咗。所以父母喺最早可以影響佢哋嘅人，父母嘅培養係好重要嘅元素。如果從小就被一d唔好嘅事情或者觀念影響咗，長大時就好難可以更正。

有d人覺得，自私唔係壞事。但係諗深一層，若果凡事以自己為先，喺你身邊嘅人一定唔會好受。最後會唔會被疏遠被放棄呢? 需要別人幫助嘅時候會唔會因為自己自私而孤立無援呢?

每個人嘅思想性格都有唔同~各人有各人嘅獨特性。無人係完美，自己都唔會係，所以最重要係專重別人。唔同嘅情況每人嘅都有唔同嘅長處。喺群體生活中，自己係唔會永遠係最重要嗰個人。

所以各位父母除咗帶小朋友上playgroup之外，可以諗諗俾d咩嘢教育先係對佢哋最好。

咩嘢位置按摩先啱呢??

有D細個d ge BB可能會唔鍾意自己瞓喺度～

可能係因為無乜安全感～爸爸媽媽可以試下將BB放喺大脾度按摩～BB會有多D安全感就會stable D ~不過記得唔好坐太高以免發生危險呀～

今日考考你

問: 你地知唔知應該幾耐幫bb按摩一次係最好呢?

答: 答案係每日都做係最好嘅~ 如果bb有肚風,腸絞痛等等常見嘅肚 仔不適，每日幫bb按2-3次，持續兩星期，可以有助舒緩~~不過記住喎，如果有特別情況一定要睇醫生，唔好耽誤診治呀!!

應該幾時開始幫bb按摩呢?

答案係:

出生第一日就可以。

 不過如果您嘅bb已經出咗世，我會話最好嘅學按摩時期係2-4個月。因為佢地未識轉身，上堂時無咁易逃走。^.^更重要嘅係，因為越細開始，佢地對按摩嘅適應度會較高。亦可以早一d同bb加強建立親子關係。

如果bb早d開始按摩，佢地瞓得好d脾氣好d對增加體重都有幫助ga~

大家好!! 呢度係BiliBaMa嬰兒按摩基地

大家好!! 呢度係BiliBaMa嬰兒按摩基地

嬰兒按摩

 係一項非常好的親子活動外，更是給父母親及嬰兒的第一堂學習課。除了學習到嬰兒按摩的手法外，過程中更有助家長可更快了解子女的喜好，了解自 己小朋友語言，小朋友又可以培養認知能力，促進智力發展。持之以恆的話，你們會發現嬰兒按摩能夠帶來你意想不到有延續性的好處。

"BiliBaMa' 會在這裡分享有關嬰兒按摩、產前產後及健康體適能的知識及課程資料。

BiliBaMa 有咩嘢含意呢?

我用咗一兩日去諗呢個名~其實剛剛開始諗個名時，我只係想諗一個特別d嘅名~ 唔好咁死板~ (嗰d Kenix Infant Massage~~ Miss Lai Massage~~ etc..... 梗係俾我踢開九丈遠啦~~)

跟住唔知點解我就諗到呢組字~

<<BiliBaMa>> 當中包含 BB、爸爸、媽媽，係一個健康家庭嘅基本。我覺得一個快樂家庭少不免會吵吵鬧鬧，嘻嘻哈哈。 溝通嘅過程中大家bilibala係正常不過嘅~~呢個名就好順利出現咗喇~~

我希望藉著Infant Massage 可以令到大家認識點樣先係真正嘅良好溝通，父母同小朋友可以體會到點樣建立良好嘅親子關係。 大家要知道，建立親密關係，唔係一下子可以做到，亦唔係物質金錢或其他人可以代替嘅。

希望Infant Massage呢個日常活動令成人可以細心想想小朋友最需要d咩~過程中你會發現一d得意有趣，或者意想不到嘅嘢ga~~

希望大家都有一個<<BiliBaMa>>嘅快樂家庭啦~~